ആള്‍ക്കൂട്ടങ്ങളില്‍ നിന്നെല്ലാം
അകന്നകന്ന് നില്‍ക്കണം
അകത്തളങ്ങളില്‍ താഴിട്ടുപൂട്ടി
ഒതുങ്ങി ഒതുങ്ങിക്കൂടിക്കൊള്ളണം
ഒട്ടുംതന്നെ പുറത്തിറങ്ങരുത്
ക്വാറന്‍ഡീന്‍ നിയമങ്ങള്‍
ഇന്നാട്ടില്‍ ഏതൊരു സ്ത്രീലിംഗത്തിനും
പുതിയതാകുന്നതേയില്ല
ഏതൊരാളില്‍ നിന്നും വൈറസ് പകര്‍ന്ന്
ജീവിതം മരണക്കളിയിലേയ്ക്ക്
എത്തിപ്പെടാമെന്നും മൂര്‍ച്ചിച്ചാല്‍
മൈനസാക്കാന്‍ മരുന്നൊന്നുമില്ലന്നും
വീട്ടുഭരണകൂടത്തിന്‍റെ നിത്യശാസനങ്ങള്‍
ഹോസ്റ്റലില്‍ ബന്ധുവീടുകളില്‍
പള്ളിക്കൂടങ്ങളില്‍ എല്ലായിടത്തുമുണ്ട്
ആകാശങ്ങള്‍ അടച്ചിട്ട ചുവരുകളും
മേല്‍ക്കൂരകളും
ലോക്ക്ഡൗണ്‍ തീരുന്നതേയില്ല എവിടെയും
അടക്കവും ഒതുക്കവുമുള്ള
ഉരു അന്വേഷിച്ച് വന്നെത്തിയവരുടെ
വീട്ടിലെത്തിയപ്പോള്‍ അവിടുള്ളതോ
ട്രിപ്പിള്‍ ലോക്ക്ഡൗണ്‍…
താലിയും സിന്ദൂരപ്പൊട്ടും
അതിന്‍റെ അച്ചുകുത്തലുകള്‍
പെണ്ണായിപ്പോയ ജന്മം തന്നെയാണ്
ആദ്യം ക്വാറന്‍ഡീന്‍ ചെയ്തത്
അതു കഴിഞ്ഞേയുള്ളൂ ഏത്
കൊറോണ വൈറസും
ക്വാറന്‍ഡീന്‍ നാളുകള്‍ നീങ്ങും
ആളുകള്‍ പൂട്ടുപൊലിച്ച്
തെറിച്ച് ചിന്നിച്ചിതറും എന്നാലും
അടുക്കളയിലും വീടിന്‍റെ വ്യാകരണങ്ങളിലും
മരണത്തിന്‍റെ താക്കോലിട്ട് മാത്രം
തുറക്കാവുന്ന ക്വാറന്‍ഡീന്‍ കുലസ്ത്രീകള്‍
പിന്നെയും ബാക്കിയാകും
മരണത്തിലും പാലിക്കപ്പെടുമെന്നുറപ്പുണ്ട്
അണുവിട തെറ്റാതെ
ക്വാറന്‍ഡീന്‍ പ്രോട്ടോക്കോളുകള്‍
പെണ്ണായിപ്പോയ ജന്മം തന്നെയാണ്
ആദ്യം ക്വാറന്‍ഡീന്‍ ചെയ്ത്
അതുകഴിഞ്ഞേയുള്ളൂ ഏത്
കൊറോണ വൈറസും….
സുനിത തോപ്പിൽ
COMMENTS