നിങ്ങളവരെ മറന്നുകളയുക
കുളക്കടവിലൊറ്റയ്ക്കിരിക്കുന്ന ഒരു ഭ്രാന്തി
നട്ടുച്ചയ്ക്ക് വെട്ടം നോക്കിയിരുന്ന്
കറി കരിഞ്ഞു പോയ പിടിപ്പുകെട്ട ഒരു വീട്ടമ്മ
കുറിക്കാശിന് പണം തെകയാത്തവള്‍
അന്തിയോളം വെള്ളം ചുമന്ന് ഉടുപ്പുനനഞ്ഞ
അങ്ങേ ചരിവിലെ വാടകക്കാരി
അങ്ങാടിയില്‍ തല്ലുകൂടുന്ന
അലവലാതിയുടെ അമ്മ
നിങ്ങളുടെ കണക്കിലെ
അക്കമാവാന്‍ പാകമല്ലാത്ത
മറ്റേതോ ഭാഷയിലെ തൂപ്പുകാരിപ്പെണ്ണ്
നിയമങ്ങള്‍ക്കുമപ്പുറത്ത് തെറിച്ച് പോകുന്നവള്‍
നിങ്ങളവരെ കണ്ടിട്ടേയില്ലെന്ന് കരുത്
ആളൊഴിഞ്ഞ നിരത്തില്‍
അടിവയറ്റില്‍ നിന്നുമൊരാളല്‍ വന്നതും
അറിയാതെ ഇടംകയ്യാലുഴിഞ്ഞതും
കിട്ടിയ ഒരാട്ടിന്‍റെയായത്താല്‍
ദൂരമെല്ലാം താണ്ടിവന്നതും
അവളെച്ചൂണ്ടി വീട്ടിലെപ്പെണ്ണിനോട് കഥ പറഞ്ഞതും
ഉറങ്ങാന്‍ കിടക്കുമ്പഴെല്ലാം മാരണം
തെളിവോടെയവള്‍ കേറി വന്നതും
ഉടലാകെ വിയര്‍ത്തതും
മറന്നേക്ക്
മറന്നു കളയ്
കൈവളക്കിലുക്കമുള്ള ഒറ്റനേരങ്ങള്‍
കൂട്ടുനടത്തകള്‍
അവള്‍ തന്ന അഭയങ്ങള്‍
അനത്തിയ കട്ടന്‍
കാഞ്ഞ സമയങ്ങള്‍
വര്‍ക്കത്തള്ള കുടുബക്കാരികള്‍ക്കിടയില്‍
നിങ്ങള്‍ പണക്കാരികള്‍ക്കിടയില്‍
സൗഭാഗ്യവതികളായ നിങ്ങള്‍ക്കിടയില്‍
അവള്‍ കേറി വരാറുള്ള വഴികളടച്ച്
കുനുഷ്ട് തേറി തടവച്ച്
ദുഷിപ്പടര്‍ത്തി മുള്ളുവെച്ച്
കാവലിനാളെ നിര്‍ത്തി
ആട്ടിയകറ്റ്
എന്നിട്ടുമൊറ്റയാകുന്ന നിങ്ങള്‍
അകത്തുമൊറ്റയാകുന്ന നിങ്ങള്‍
ആര്‍ത്തലച്ചു പോകുന്ന നേരങ്ങളിലേക്ക്
അമ്മേ! യെന്നു വിളിക്ക്,
തിരിഞ്ഞും മറിഞ്ഞും ഇരുളു നീന്തി വെളിതേറി
തലതല്ലിയിരിക്കുമ്പോള്‍
ഒരു മിന്നലില്‍
അവള്‍ തന്നെ തെളിയുമ്പോള്‍
കളത്തിലിരുന്ന് ജപിച്ചൂത്
പറഞ്ഞയക്ക്.
സിന്ധു.കെ.വി
കവി
COMMENTS