വെളിച്ചം കണ്ണില്‍ അടിച്ചപ്പോള്‍
അയാള്‍ എഴുന്നേറ്റു
പൂമുഖത്തു തന്നെ കാത്തിരിക്കുന്ന
ചാരുകസേരയിലേക്ക് മലര്‍ന്നു
കാലുകള്‍ വിറപ്പിച്ച്
അകത്തേക്ക് നോക്കി
ഒരു ചായ പറഞ്ഞു
പുറത്ത് കിണറ്റിന്‍കരയില്‍
കാടുകാട്ടിയൊരു കുളി
അടിവസ്ത്രം ഊരി അവളുടെ നേര്‍ക്ക്
ബസ്സില്‍ മുന്‍വാതിലിലൂടെ
ഓടിക്കയറിയ അയാള്‍
ഓളപ്പാത്തിയില്‍ വെള്ളത്തുള്ളി പോലെ
മുമ്പോട്ടും പിമ്പോട്ടും
പിടിച്ചുലായാവുന്നൊരു
നീണ്ട കമ്പിയായി
നിന്നു തുളയുന്നു
സ്കൂളിലെ
മൂത്രപ്പുരയില്‍
സുഖലഹരിയില്‍
അയാള്‍
തിരഞ്ഞിട്ടു പിടിച്ചവര്‍
ഊഴമെത്തുന്നതും ഭയന്ന്
ചുമരു ചാരി നില്‍ക്കുന്നു
പരസ്പരം മിണ്ടാന്‍
അവര്‍ക്ക് വാക്കുകളോ
ചിഹ്നങ്ങളോ ഇല്ല
ക്ലാസ്സുമുറിയൊരു
ഡിസ്കഷന്‍ ടേബിള്‍ !
നഗരത്തില്‍ തിരക്കുപിടിച്ച
നാല്‍ക്കവലയില്‍
റോഡരികില്‍ അയാള്‍..
ജീന്‍സിന്‍റെ സിബ്ബു വലിച്ചൂരിയോ
ഉടുമുണ്ട് ഇടംവലം വകഞ്ഞോ
വിരലുകളാല്‍ പതുക്കെ ചലിപ്പിച്ചു കാമം
കറന്നെടുക്കുന്നു.
ലോകമേ ഈ മൂത്രം
തീരുന്നില്ലല്ലോ എന്ന നില്പു
തുടരുന്നു
കുളക്കരയിലെ
കവുങ്ങിന്‍ തോപ്പിലാണയാള്‍
കൊഴിഞ്ഞുവീണ പഴുക്ക
തിരയുന്ന പോലെ
കണ്ണുകള്‍ പരത്തുന്ന പാളി വീഴുന്നു
അന്തിവെയിലില്‍
മുങ്ങിക്കുളിക്കുന്നവര്‍ക്കിടയില്‍ ഒരു
പരസ്യചിത്രമാകുന്നു സെല്‍ഫികള്‍
നാട്ടിലെ
സദാചാര വിരുദ്ധ പ്രവര്‍ത്തനത്തിനെതിരെ
ശക്തമായി അപലപിക്കുന്ന
അയാളിപ്പോള്‍
മീഡിയകളില്‍ നിറയുന്ന
വിവേകിയും
സാമൂഹിക പ്രതിബദ്ധതയുമുള്ള
തികഞ്ഞ ഒരു പൗരനാണ്.
ലിസ പുല്‍പ്പറമ്പില്‍
അദ്ധ്യാപിക
COMMENTS