കന്യാമറിയമെന്ന വാഴ്ത്തപ്പെടൽ
പ്രകൃതിക്ക് നേരെയുള്ള
കണ്ണ് കെട്ടലാണ്
കന്യകാത്വമെന്ന ബാധ്യതയുടെ
കുരിശുതാങ്ങി നടന്നവൾ
വിശുദ്ധ മറിയമെന്ന്
വിളിക്കപ്പെടുമ്പോഴും
സംശയത്തിന്‍റെ പരിഹാസത്തിന്‍റെ
മുൾച്ചെടിയിൽ
എത്ര തവണ
കുരുങ്ങിപ്പിടഞ്ഞിരിക്കും?
ദൃശ്യപ്പെടാതെ
എത്ര കല്ലുകൾ കൂർപ്പിച്ച്
ഇരുൾ മറവിൽ അവൾക്ക്
നേരെ ഉയർന്നിരിക്കും?
“പാപം ചെയ്യാത്തവർ
കല്ലെറിയട്ടെ” എന്ന ദൈവപുത്ര
വചനം കേൾക്കെ എത്ര ചുണ്ടുകൾ
നീ പാപിയുടെ മകനെന്ന് പുച്ഛത്തോടെ
പിറുപിറുത്തിരിക്കും?
കുരിശു ചുമന്നതിനാൽ
പാപത്തിന്‍റെ ശമ്പളം മരണമെന്ന്
അവൾ കേൾക്കെ ഉയർന്നിരിക്കും?
അത്ര സുഖകരമാവില്ല
ചിതറിപ്പോകാതെ മുട്ടത്തോടിനു
മുകളിലൂടെ നടക്കേണ്ടിവരുന്ന
സാഹസവും സൂക്ഷ്മതയും
ജീവിതം അതാകുമ്പോൾ
നിങ്ങൾക്കവളെ വിശുദ്ധയാക്കാം
നിത്യകന്യകയാക്കാം
ദൈവമാതാവാക്കാം
ചാർത്തപ്പെട്ട വിശേഷണത്തിന്‍റെ
ദൈവസ്തതയിൽ
ജൈവസ്തത നഷ്ടപ്പെട്ടവൾ
കാമനകൾ ദ്രവിച്ച്
പുഞ്ചിരികൂടി ദൈവത്തിനു
ദാനം നൽകി മരണത്തിന് മുൻപേ
സ്വയമൊരു ശില്പമായിട്ടുണ്ടാകാം.
കോഴിക്കോട് സർവ്വകലാശാല മലയാളവിഭാഗം ഗവേഷക കവിത ലേഖനങ്ങൾ എന്നിവ ആനുകാലികങ്ങളിൽ പ്രസിദ്ധീകരിച്ചു വരുന്നു.
2019 ലെ കെ.എസ്.ബിമൽ ക്യാമ്പസ് കവിത പുരസ്ക്കാരം ലഭിച്ചു.
COMMENTS